Les grands
classiques

Poésie Française : 1 er site français de poésie

Les grands<br>classiques

Guillaume DES AUTELZ
1529 - 1581

A sa Sainte

Je fais sepulchre à ton loz de mes vers,
Vers, qu'Amour mesme ha pour nous fait si fors,
Qu'ilz ne craindront de la mort les effors,
Quand nous serons tous deux rongez des vers :

Tant que la vive ame de l'Univers,
Fera tourner la roue des sept corps,
Qui l'harmonie engendrent des accors,
Que font tousjours leurs mouvemens divers :

Le bruit volant de l'un à l'autre pole,
Les portera sus sa puissante espaule,
Pour les faire estre en tous lieux renommez :

Et ton renom, que par escrit je couche
Avec honneur, volera par ma bouche
Non du vulgaire, ains des plus estimez.